ទឹកបន្លែផ្លែឈើប៉ូវកម្លាំង

គ្រឿងផ្សំ

• ត្រសក់ធុនតូច ២ ផ្លែ
• ម្នាស់ (ផ្លែមួយពុះជា៤ ចំណិត) ១ ចំណិត
• ស្ពៃក្រញាញ់ក្តោប ២ សន្លឹក
• ទឹកស្ករ ២ ស្លាបព្រាបាយ និង ទឹកកក ៤-៥ ដុំ

វិធីធ្វើ

1. ត្រសក់លាងទឹកឲ្យស្អាត និង ហាន់ជាចម្រៀកកង់តូចៗ។
2. ស្ពៃក្រញាញ់ក្តោបលាងទឹកឲ្យស្អាត និង​ហាន់ជាចម្រៀកតូចៗ ម្នាស់ចិត សម្បកឲ្យស្អាត និងហាន់ជាបន្ទះស្តើងៗ។
3. ដំបូងត្រូវដាក់ស្ពៃក្រញាញ់ ចូលទៅក្នុងឧបករណ៍គាបផ្លែឈើ និង ជាបន្តបន្ទាប់ដាក់ម្នាស់ និង ត្រសក់គាបយកទឹកទុកប្រើការ។
4. ក្រោយពីបានទឹកបន្លែផ្លែឈើដាក់ក្នុងកែវ ទើបចាក់ទឹកស្ករ និង​ដាក់ដុំ ទឹកកកចូល ហើយកូរឲ្យសព្វទុកជាការស្រេច។

ផលប្រយោជន៍

            ស្ពៃក្រញាញ់ក្តោបសម្បូរទៅដោយជីវជាតិ B1 និង C ព្រមទាំងសំបូរជាតិ កាល់ស្យូម ដែក និង ប៉ូតាស្យូម ដែលជាសារធាតុ អាចប៉ូវឆ្អឹង និង ជួយបំប៉នអ្នក ជំងឺខ្វះឈាម។ ប៉ុន្តែដោយជារឿយៗ គេនិយមយកវាមកចម្អិនធ្វើជាអាហារ ទើប​ បាត់បង់នូវជីវជាតិអស់។ ដូច្នេះក៏មានគេយកវាមកធ្វើជាអន្លក់ស្រស់ផ្ទាប់ដូចជា សាឡាត់ ឫ គាបយកទឹកស្រស់ ក៏ជាវិធីល្អមួយដែរ។